Mar 12 | KYG | STEP | Yesu'a aepa faino aeno kalafefa gemo huno hapa paino'ae'mo, mago vekamo'a nofi hoyamo vai maleteno kegi'ya huno ku ai maleteno nofi alagamo ae'a lata paisageno ani'amo lamisiya kelimo kafi maleteno yatala no'mo ani hoyale'mo yagai'a maisaya vaya'ai no'mo ki male'niye. Agaemo mago vaya'mogi yagai'a ate'nisageno nofi alagamo afu lesige'apae'mo apakaemo ani nofi alagamo lagisayafe'mo apavaleno apateteno afagi kotegamo u'niye.

Mark 12

Nofi hoyae'mo aeno kalafefa gemo huno hu'niya gemae

(Mt 21:33-46; Lu 20:9-19)

1 Yesu'a aepa faino aeno kalafefa gemo huno hapa paino'ae'mo, mago vekamo'a nofi hoyamo vai maleteno kegi'ya huno ku ai maleteno nofi alagamo ae'a lata paisageno ani'amo lamisiya kelimo kafi maleteno yatala no'mo ani hoyale'mo yagai'a maisaya vaya'ai no'mo ki male'niye. Agaemo mago vaya'mogi yagai'a ate'nisageno nofi alagamo afu lesige'apae'mo apakaemo ani nofi alagamo lagisayafe'mo apavaleno apateteno afagi kotegamo u'niye. 2 Nofi alagamo ago afu le'nigeno'ae'mo agaemo mago nofi alagamo alisiyafe'mo ali'ya'ale'mo mai'niya vekamo alino ate'nigeno hoya'ale'mo yagai'a ate'naya vaya'aitegamo u'niye. 3 U'nige'a hoya'ale'mo yagai'a ate'naya vaya'mogimo atafau'a amagite'apae'mo, okamigunanagi afa'a ataleka uvo, hu'a ha pai'nageno ataleno u'niye. 4 Hoya aepa vekamo'a halate mago alu vekamo aliya'ale'mo mai'niya vekamo alino ategeno ne'vige'apae'mo yafa kayoteti'mo ali'a anu'mo ai'a apalo ati'a amagite'a ali'a hosu hu'a ate'nae. 5 Agaemo mago alu vekamo ali'ya'ale'mo mai'niya vekamo alino ategeno uno ava'yi nehige'apae'mo kamiti amagi'nae. Ani kava huno mago'e vaya'mo alino apate'nige'a u'nage'apae'mo mago vaya'amo aise'amo apamagige mago vaya'amo kamiti apamagige hu'a apamagi'nae. 6 Magoke mafa'ne'ae'mo hau ayamopafi'mo hau'niya mafa'ne'age'mo mai'nigeno henaga'amo, mani mafa'ne'nimo ge'amo afa'a afigae, huno huteno alino ate'nigeno u'niye. 7 U'nige'apae'mo hoya'ale'mo yagai'a ate'naya vaya'mogimo agete'apae'mo, hoya aepa vekamo mafa'ne'amo'mo muki afo'amo ya'mo aligiye. Amagigetao agaemo alisiya hoyamo lagaemo aligunanagi, hu'a hute'a 8 atafau'a kamiti amagite'a kefa'amo alini'u'a kegi'ya malaga yaga au'a atale'nae. 9 Inagi hoya aepa vekamo'a na agufa kava hugiye. Eno hoya'ale'mo yagai'a ate'naya vaya'aina kamiti apamagiteno alu vaya'mogi hoya'ale'mo yagai'a atesayafe'mo apavaleno apategaiye. 10 Lapakaemo mago gemo Goti'a avo'mo kae male'niya gemo lekana opai'nafiye. Ani gemo'a huno'ae'mo,

Yafateti'mo no'mo nekiya vaya'mogimo mago yafafe'mo hu'apae'mo, afa yafane, hu'a hu'naya yafa'mo'a mago hogote yafa'mo afole ai'niye. 11 Ala kava ne'mo'a ani kava'mo alino afole aino ate'nigeta ageta lahau aitetae'mo, vae, huta, alagepa kava'mo nehiye, huta nehune,
huno hu'niye, huno Yesu'a hapa pai'niye. 12 Hapa pai'nige'a afite'apae'mo, ani aeno kalafefa gemo lagaefeke'mo hu'niye, hu'a hute'a atafau'a kalavusi hu'a atesayafe'mo hu'naya'monanafa muki vaya'aife'mo koli hu'naya'mofe'mo atale'a u'nae.

Takesi hisaya kavafe'mo ge hu'a afi ge'naya gemae

(Mt 22:15-22; Lu 20:20-26)

13 Apakaemo atale'a ute'a Falasi vaya'e Heloti'a akame nehaya vaya'efe'mo hapa pai'apae'mo, ane'ai hanagi male'nageno malage huno ne'atafaiya kava hutapa yagai'netapa ge'aleti'mo atafaiyo, hu'a hapa paite'a ali'a apate'nage'a agaetegamo u'nae. 14 E'apae'mo, Tisao, hu'a, ago kage'nonana lama gemo nehana vekamo mai'neka muki vaya'aife'mo koli osuka muki vaya'aitegamo magoke aiyaya kava'mo nehane. Goti ge'amo akame hisaya kavatefe'mo lama gekaleti'mo alika apaya ne'malane. Lagaemo takesi monimo Sisa'a yagaino ne'apateya gamani vekamo amisunafe'mo ke'aepa gemo'a huno'ae'mo, amiyo, huno hu'nifi osu'niye. 15 Takesi monimo apamisupi o'apamisune hu'a afi ge'nageno'ae'mo Yesu'a apakesamo afite'a apaipafati'mo ge osu'nafa ae'a ati kae'a hu'naya ge'apimo apaketeno'ae'mo, na kava higetapae'mo namalageka hutapa nafi nekae. Alaga monimo alinitetapa nave liyo, huno hapa pai'niye. 16 Apakaemo alini e'a ami'nageno'ae'mo, mani alaga monile'mo ina la augosa'e agi'e'mo avo'mo kae male'naya monimo hane'niye, huno apafi ge'nige'apae'mo, Sisa augosa'e agi'e'mo hane'niye, hu'a ha pai'nageno'ae'mo, 17 Sisa ya'amo Sisana amitetapa Goti ya'amo Gotina amiyo, huno hapa pai'nige'apae'mo hapau ai'nae.

Fali'naya vaya'mo he tisaya kavafe'mo loka hu'a afi ge'naya gemae

(Mt 22:23-33; Lu 20:27-40)

18 Satiyusi mono vaya'mogimo fali'naya vaya'aife'mo he otigae, hu'a apakesamo ne'afiya vaya'mo agaetegamo e'nae. Apakaemo loka hu'a ate'apae'mo, 19 Tisao, hu'a, Mosese'a avo'mo kae male'niya gemo'a huno'ae'mo, mago vekamo'mo a'mo aliteno mafa'nemo alino o'ateno falitesigeno'ae'mo konaga'amo'mo kogu'amo aliteno fali'niya vekamo aimu'yale'mo mafa'nemo alino apateno, huno hu'niye. 20 Mago afina'mo seveni'a konagamo mai'nae. Nepu'apimo'mo mafa'nemo alino o'ateno ataleno falitegeno 21 agana'amo'mo kogu a'mo ali'niye. Napa tu konaga'amo'mo ani kava huno falitegeno napa tali konaga'amo'mo ani kava huno falitege'a 22 ani kava'mo hu'a alite'a falite falite hu'a seveni'a konagamo ago fali'a hano hu'nae. Falitageno'ae'mo a kanomo henaga'amo fali'niye. 23 Fali'a u'nayategati'mo he tisageno'ae'mo haiya vekale'mo ani a kanomo maigiye. Seveni'a konagamogimo ali'naya'mofe'mae, hu'a afi ge'nae. 24 Afi ge'nageno'ae'mo, lapakaemo Goti mukufi gemo o'afige Goti'a ayamufa'age vekamo mai'niye hutapa o'afige hu'naya'mofe'mo ika ika lapakesamo ne'afiye. 25 Fali'a u'nayategati'mo he ti'apae'mo a'mo o'alige vele o'maige hugaya'monanafa koku'napi enisole vayakana hu'a maigae. 26 Fali'a u'nayategati'mo he tisaya kavafe'mo Mosese'a mukufi'mo avo'mo kae male'niya gemo aise yosafati'mo ata nelegeno Goti'a Mosesefe'mo ha pai'niya gemo lekana paitapa o'afi'nafiye. Goti'a huno'ae'mo,Emalehamu Goti'amo'na maige Aisiki Goti'amo'namo maige Yekopu Goti'amo'namo maige hu'na Goti'apimo'namo mai'nove, huno hu'niye. 27 Agaemo alagi fali'naya vaya'ai Goti'apimo'a o'mai'nifa afa'a ne'maiya vaya'ai Goti'apimo'a mai'niye. Alagi ika ika lapakesamo afi'netapae'mo ani gemo nehae, huno hapa pai'niye.

Hogote ke'aepa ge'ae'mo hu'niya gemae

(Mt 22:34-40; Lu 10:25-28)

28 Mago vekamo ke'aepa gemo afiteno alino apaya ne'maleya vekamo'a eno ge huge afige hu'a mai'naya gemo afi'niyana Yesu'a ge'apile'mo alagepa huno aeno atagaina huno hapa pai'niye, huno agesa afiteno'ae'mo, ke'aepa gefati'mo hogote ke'aepa gemo haiya gemo hane'niye, huno afi ge'niye. 29 Afi ge'nigeno'ae'mo, hogote ke'aepa gemo hane'niyana,

Isaleli vaya'mogitapamo afiyo, huno, Ala kava ne'mo Gotitimo'a mai'niye. Ala kava ne'mo magoke vekamo mai'niye. 30 Lapakaemo Ala kava ne'mo Gotitapimofe'mo muki lapaipafatinagi muki lapaune lapamepatinagi muki lapakesamo ne'afiya yatapifatinagi muki lapayamufafatinagi huno lapaino.
Ani gemo hogote ke'aepa gemo hane'niye, huno huteno, 31 Lole ke'aepa gela'mo'a huno'ae'mo,

lapakaitapie'mo lapau lapayamopafi'mo nelapaiya kava huno lapaopale'mo ne'maiya vaya'aife'mo lapaino,
huno hu'niye. Huno huteno, mani lole ke'aepa gela'mo'a muki ke'aepa ge'amo ago aeno aga se'niye, huno ha pai'niye. 32 Ha pai'nigeno'ae'mo ke'aepa gemo avo'mo kaeno alino apaya ne'maleya vekamo'a huno'ae'mo, Tisao, huno, alagepa gemo hane. Goti'a magoke vekamo mai'niya'mofe'mo alu goti'a o'mai'nifa agai'ageke'mo mai'niye, huka hana gemo lama gemo hane. 33 Agaefe'mo muki laipafatinagi muki lagesamo ne'afuna yatifatinagi muki laune lamepatinagi muki layamufafatinagi huno lahau'nisigeta lagaitie'mo lahau layamopafi'mo nelahaiya kava huta lahaopale'mo ne'maiya vaya'aife'mo lahaisiya kava'mo'a afumo amagita atafi'mo kaeta Goti'mo ofalinimo amige alu ofalinimo amige hisuna kava'mo ago aeno aga se'niye, huno hu'niye. 34 Yesu'a ani hu'niya gemo afiteno'ae'mo alagepa huno afi'niye, huno agesamo afiteno'ae'mo, kagaemo Goti'a yagaino ne'apateya kegi'yafi'mo uka haika falesanafe'mo eka hogo hu'nane, huno ha pai'niye. Yesu'a ani gemo huno ha pai'nige'apae'mo koli hute'a mago'e gemo hu'a loka hu'a afi oke'nae.

Kalaisi nefe'mo ge huno apafi ge'niya gemae

(Mt 22:41-46; Lu 20:41-44)

35 Yesu'a Yu vaya'ai alopa mono nopi'mo haino alino apaya ne'maleno'ae'mo, na kava hige'apae'mo ke'aepa gemo ali'a apaya ne'malaya vaya'mogi hu'apae'mo, Kalaisi ne'mo Nevini akamelegati aginago'amo mai'niye, hu'a nehae. 36 Aote Auneme'amo'mo Nevini'mo mago gemo alino ami'nigeno huno'ae'mo,

Ala kava ne'mo Ala kava ne'nie'mo huno'ae'mo, lamaga nahaopale'mo faika maime maime ne'uge'nao kamekamo apamagisuge'a kaiya afe'alumelaga maigayanagi,
huno hu'niye. 37 Nevini'a Kalaisi nefe'mo Ala kava ne'nie, huno hu'niya'mofe'mo haiya kava huno Kalaisi ne'mo'a Nevini akamelegati aginago'amo mai'niye, huno apafi ge'niye. Muki asole vaya'mogimo ani gemo afite'apae'mo amuse hu'nae. 38 Alino apaya maleteno'ae'mo, ke'aepa gemo ali'a apaya ne'malaya vaya'aife'mo ehetapiye. Apakaemo hapau'nige'a yatala kukenamo ali'a vai'a alite'a umenitata nehae. Maketi kumategamo mai'naya vaya'mogimo ge apamamaete'a amuse hu'a ne'apataya kavafe'mo nehapaiye. 39 Hapau'nige'a alu mono nopi'e alu mono nopi'e'mo hai'a anaga maige yagita nehayategamo ala apaki vaya'mo ne'maiya siate'mo hai'a maige nehae. 40 Apakaemo kogu a'ne'ai kagemi ya'apimo kumaya'mo alite'apae'mo ae'a ati kaesayafe'mo yatala nunumu nehae, huno hapa pai'niye.

Kogu a kanomo'a ofalini monimo male'niya gemae

(Lu 21:1-4)

41 Yesu'a Yu vaya'ai alopa mono nopi'mo haino ofalini monimo ne'malaya kesimo haopale'mo fai mai'nige'apae'mo asole vaya'mogimo ofalini monimo male'nageno apake'niye. 42 Mago kogu a kanomo kagemi ya'amo ohane'niya kogu a kanomo'a eno lole asagalifa monila'mo male'nigeno age'niye. 43 Agaemo ge'amo ne'afiya vaya'aife'mo ge hu'nige'a e'nageno'ae'mo, lama gemo lapa nepauve, huno, mani kogu a kanomo kagemi ya'amo ohane'niya kogu a kanomo'a male'niya monimo'mo muki vaya'amogimo male'naya monimo ago aeno aga se'niye. 44 Muki vaya'amogimo alopa moni'apimo male'naya yapati'mo alini e'a male'naya'monanafa agaemo moni'amo o'male'niya yapati'mo ne'ya'amo miya faino nesiya monimo ataleno hano hu'niye, huno hapa pai'niye.